करोना पुढील चार आठवड्यात 'निर्णायक' ठरणार

या महिन्याच्या अखेरपर्यंत जगभरात करोनाचा संसर्ग निर्णायक वळणार पोहचणार असल्याचा दावा चीनच्या शास्त्रज्ञांनी केला आहे. त्याशिवाय चीनमध्ये करोना संसर्गाचा दुसरा टप्पा सुरू होणार नसल्याचा दावा त्यांनी केला आहे. करोना संसर्गाच्या दृष्टीने आगामी चार आठवडे महत्त्वाचे असल्याचे शास्त्रज्ञांनी म्हटले.

चीनमध्ये करोना संसर्गाचा दुसरा टप्पा सुरू होणार असल्याची चर्चा होती व तशी शक्यताही वर्तवण्यात आली. मात्र, चीनमध्ये करोनाचा पुन्हा फैलाव होऊ नये यासाठी कठोर उपाययोजना करण्यात आले असल्याची माहिती डॉ. झोंग नानशान यांनी दिली. करोना संसर्गाच्या नियंत्रणासाठी चीन सरकारने डॉ. झोंग यांना नियुक्त केले आहे. त्यांनी एका मुलाखतीत सांगितले की, करोनाचा संसर्ग वेगाने होत असून यामध्ये रुग्णाचे प्राणही जातात. त्यामुळे करोनाच्या नियंत्रणासाठी दोनच पर्याय आहेत. करोना संसर्गाचा दर कमी करणे आणि त्याचा फैलाव होण्यापासून अटकाव करणे. जेणेकरून बचावासाठी अधिक वेळ मिळू शकतो, असेही त्यांनी म्हटले. तर, दुसऱ्या पर्यायात काही उपाययोजना आखून करोना रुग्णांची संख्या कमी करणे आणि संसर्गाच्या फैलावास अधिकाधिक उशीर करणे हेच एकमेव मार्ग असल्याचे त्यांनी सांगितले.